HƠĐƠ̆NG LĂM KRĂ YANG

 

HƠĐƠ̆NG LĂM KRĂ YANG

Trong tơm: “…Na dang ei iĕm athei chơ̆n jơhngơ̆m iĕm 'nĕ kơ hli tơdrong kiơ. Iĕm adrin lui kơ 'Bok Kei-Dei păng lui kơ Inh.” (Yô-han 14:1 )


-         Nơ̆r BKD: Yô-han 14:27, 16:33

33 Inh roi kơ iĕm dôm tơdrong noh hei wă kơ iĕm chơt hiôk yua kơ iĕm gơnang kơ Inh. Tơ ala teh âu iĕm gô đei tơdrong anat anot. Mă-lei iĕm 'nĕ kơ sơ'ngon hŏ yua kơ tôm tơdrong ala teh âu thuơ kơ Inh ngăl boih.” 27 “Inh wă tơklah đơ̆ng iĕm na Inh ăn kơ iĕm jơhngơ̆m hiôk. Jơhngơ̆m Inh hiôk dang yơ, Inh ăn kơ iĕm hiôk dang noh mơ̆n. Inh ăn kơ iĕm hiôk ưh kơ thoi lu bơngai ala teh ăn kơ iĕm hiôk ôh. Iĕm 'nĕ sơ'ngon păng 'nĕ kơ hli.


Pơih pơma blŭng a: Hơdrol hloh kơkuh bơnê kơ Kră Yang 'Bok Kei-Dei oei hơdai tơgŭm ăn kơ lu bơ̆n oei liĕm akâu tôm, mă khan teh đak âu đei lơ tơdrong truh thoi kơ dang ei…

Sơ̆ lu bơngai Jơ̆ng ‘bang Yêsu kư̆m tơ ‘bơ̆p tơdrong hli krưp tih, tơdrong nhen thoi pă đei hơ’mĕng kơ wă arih dơ̆ng, yua kơ đơ̆ng rŏng kơ pơ̆ng pơ lôch Kră Yang lu lĭnh Rôm păng lu bơngai areh kơ Kră Yang Yêsu chă lu sư wă pơrăm lê̆. Lu sư hli tơ rơ  kơdih kơdih, yua ưh kơ đei răk(hiơt) nơ̆r Kră Yang pơkă(Kră Yang gô iung arih kơtĕch 3 măng) na đei mă ‘nah weh tơ klah đơ̆ng khul, đei mă ‘nah ôn kơ ‘nơp lăm hnam ưh pă pơ̆n lĕch(Yô-han 20:19)… tơdrong jĭ toi truh pơm kơ bơ̆n kư̆m hli tơrơ thoi lu sư sơ̆ mơ̆n, dang ei rim hnam akŭm ưh kơ đei akŭm yua đe ưh ăn tơpôl lơ akôp, mă lei bơ̆n bơngai lui kơ Kră Yang wă kơ bơ̆n ‘nĕ hiơt kơ nơ̆r Kră Yang pơkă, mă tơ ‘bơ̆p tơdrong gleh glăn kiơ truh Kră Yang Sư ưh kơ achăng pră lu bơ̆n ôh.

Kră yang pơkă lê̆ hơdrol gô đei tơdrong gleh truh kơ lu jơ̆ng ‘bang (Yô-han 16:33), păng jơhnơr tuch luch(Lu-ka 21 ), tơdrong noh ưh kơ jor ôh gô đei ‘bôh. Mă loi lăm 2 sơnăm kơ ‘nâu bơih bơ̆n ‘bôh tơdrong jĭ hơbuh ‘bơm kơ lơ teh đak, pơrăm tơ hiong lê̆ lơ bơngai lôch.

Lei bơ̆n bơngai lui athei đei jơhngơ̆m thoi yơ lăm sơnăm jĭ jăn pơmat truh âu? hăm trŏ kơ bơ̆n hli/ dah ưh kơ hli kơ tơdrong ‘noh? Kră Yang wă kơ bơ̆n pơhrăm iŏk tơdrong kiơ đơ̆ng tơdrong âu?

1.     ATHEI CHƠ̆N JƠHNGƠ̆M, ‘NĔ KƠ HLI

Tơdah đei bơngai jet lu bơ̆n ih hăm hli kơ tơdrong jĭ toi hơbuh, ih drơ̆ng liơ? Inh tơchĕng kiơ̆ jơhngơ̆m kon bơngai bơ̆n drơ̆ng hli. Yua kơ bơ̆n ‘bôh tơdrong ‘noh ưh kơ pơchơt ôh, jĭ pơm kơ rơbâu kơ̆l bơngai lôch na bơ̆n khan ưh kơ hli liơ? Đei bơngai lui bơ̆n mơ̆n, kư̆m đei lu ‘Bok Pơtho yua kơ tơdrong jĭ ‘bơm na lôch… Trŏ bơih gah sĕch akar bơ̆n hli(Kră Yang Yêsu wă tŏk tơ ‘long pơglang dai hli tơtăm). mă lei Kră Yang ăn kơ bơ̆n tơdrong Hiôk Hơđơ̆ng,  Hiôk Hơđơ̆ng ei pha-ra kơ Hiôk Hơđơ̆ng teh đak âu( khan hơgĕi mă lei minh tŏ vi-rut pơm kơ lơ teh đak thuơ, … ), ‘noh bơih Yang Pơhngol ‘Lơ̆ng Sư oei hơdai bơ̆n(Yôhan 14:27).

Yua kơ lu bơ̆n đei đon lui na BKD pơlung bơ̆n lăm jơ ‘nâu wă kơ bơ̆n chơ̆n jơhngơ̆m păng ‘nĕ kơ hli. Yua kiơ athei ‘nĕ kơ hli? Yua tơdrong ‘noh khŏm truh păng Sư kư̆m khan lê̆ hơdrol đơ̆ng sơ̆ na mưh ‘bôh bơ̆n huăy kơdrăt.

Ưh kơsĭ yua kơ bơ̆n ưh kơ hli na bơ̆n mơ̆ng ai pơm kiơ bưh kiơ̆ kơ bơ̆n, ưh kơ kăl chu pơyom đe khan. Mưh thoi ei ‘noh bơ̆n wă pơlong Kră Yang ưh kơ sĭ bơ̆n chu kiơ̆ Sư. Roi pơtih gya kơ minh ‘nu bơngai wă kơ Kră Yang dŏng sư mă lei ưh kơ pơm kiơ̆ lu bơngai mă Kră Yang yua.

Bơ̆n athei chơ̆n jơhngơ̆m mưh ‘bôh tơdrong hlĭch truh kang năr kang rai dêh ‘noh bơ̆n băt ‘blep trŏ thoi Kră Yang pơkă, păng bơ̆n huăy kơ hli dêh thoi bơngai ala teh(yua bơ̆n đei Kră Yang oei hơdai) mă lei athei pơyom kơ lu sư khan, na tơdrong jĭ ‘noh huăy kơ lanh apoh kơ bơngai nai.

2.     LUI GƠNANG KƠ KRĂ YANG

Yua kơ kiơ lu jơ̆ng ‘bang hli tơ rơ kơdih kơdih kơ dâu ôn klĕnh đơ̆ng rŏng đe pơ̆ng Yêsu tơ ‘long pơglang? Yua kơ lu Sư ưh kơ lui ngeh kơ nơ̆r Kră Yang akhan lê̆ hơdrol, pêng wơ̆t Kră Yang khan kơ lu sư gah tơdrong Sư chu lôch tơ ‘long pơglang na kơtĕch 3 măng iung arih dơ̆ng, mă lei lu sư ưh kơ đei răk na lu su hli kơ Kră Yang lôch ‘măng glơh ưh kơ thoi nơ̆r pơkă. Wă khan lu sư ưh timă gơnang kơ Kră Yang tơpă.

Inh tơchĕng gah lu bơ̆n kư̆m thoi ei mơ̆n, tơdah bơ̆n ưh kơ đei ‘blŏk răk nơ̆r Kră Yang pơkă kơ lu bơ̆n, lei lu bơ̆n gô hli mưh tơ’bơ̆p tơdrong truh lăm chăl arih lu bơ̆n. wă kơ lu bơ̆n oei dơ̆ng kơjăp lăm drong lui băt gơnang păng lui ngeh kơ nơ̆r Kră Yang pơkă.

Tuch luch đŏk nơ̆r ‘Bok Kei-Dei: Hơ-ri-so 91:1-10

1 Bơngai bu oei lăm anih hlơp Kră Yang mă Tih Hloh.

Gô oei lăm yơ̆p Tơ'ngla mơsêh mơyang.

2 Inh gô khan gah Kră Yang Yêhôwa: “Sư boih anih mă inh gơ'nơp păng kơđông kơjăp mă inh hơđơ̆ng.

Sư boih Kră Yang 'Bok Kei-Dei mă inh gơnang.”

3 Sư gô pơklaih ih đơ̆ng hơđong kap sem.

Păng đơ̆ng lôch hơbuh.

4 Sư gô pĕng bơwei ih hăm sŏk pơnăr sư.

Ih gô gơ'nơp tơ ala pơnăr sư. Tơdrong tơpăt Sư jing khêl păng kơđông kơjăp pĕng ih.

5 Ih pă đei hli boih mă tơdrong hli krưp kơ măng,

mă 'brơ̆m păr kơ'năr

6 Kŭm huay kơ hli tơdrong jĭ hơbuh truh lăm măng mu.

Dah tơdrong đe pơlôch pơrăm kơplah 'năr dơ̆ng.

7 Gô đei rơbâu bơngai pơ̆k cheng ih păng hơngan bơngai pơ̆k lôch gah 'ma ih.

Mă-lei tơdrong răm noh huay kơ truh tơ ih.

8 Ih lăp lăng 'bôh hăm măt đĕch.

Păng gô 'bôh tơdrong pơm tơwih kơ lu bơngai pơm kơnê̆.

9 Ơ Kră Yang Yêhôwa yua kơ Ih jing anih inh gơ'nơp.

Ơ Kră Yang Tih Hloh Ih pơjing boih anih oei,

10 Thoi noh ưh kơ đei tơdrong răm kiơ mă truh kơ ih.

Kŭm ưh kơ đei jĭ hơbuh kiơ mă truh tơ bơsŭn ih.

 

-         Wă bơ̆n ‘nĕ hiơt krao khan tơgŭm kơ teh đak Việt Nam lăm noh đei tỉnh Gia Lai bơ̆n, apĭnh ‘Bok Kei-Dei mơnat kơ bơ̆n lu bơngai lui bơih kơ Sư, păng krao khan tơgŭm kơ lu bơngai ưh tam mă lui wă kơ lu sư lui kơ BKD na teh đak bơ̆n đei pŭn hiôk đei BKD oei hơdai. Yua kơ teh đak iơ lui kơ BKD lơ teh đak ‘noh đei pŭn hiôk tôm mah.

-         Lăm pơgê ‘nâu mă thoi yơ hĭ bơ̆n hơđơ̆ng yua kơ bơ̆n đei BKD oei hơdai, bơ̆n athei gơnang kơ Kră Yang yua Sư ưh kơ achăng pră lu bơ̆n. kư̆m ‘nĕ hiơt pơyom bơngai pơgơ̆r lu bơ̆n(tuân thủ sự chỉ đạo cuả bộ y tế)  na tơdrong arih pơlei pơla oei tơproh ‘lơ̆ng. 

A MEN

Nhận xét

Đăng nhận xét

Bài đăng phổ biến từ blog này

MƠJA HĂM PƠGAR PLĔI HƠMU

Hình ảnh
‘NĔ PĂ YƠ YƠ̆ KƠ PLAH OEI LĂM CHĂL ARIH ÂU Đei minh pôm mơja tơmang ‘bôh lăm pơgar đe đei pơtăm plĕi hơmu đum ‘brông ‘brang; sư tơchĕng đon wă ‘maih mơ̆t sa lu plĕi hơmu ei mă lei ưh kơ đei trong wă gơh mơ̆t, yua kơ đe adrong kơjăp khơ̆ng. Rim năr sư dăr pơgar plei hơmu ei wă chă hơmŏ đei   bơlôh trôm gơh mơ̆t tơlăm, tơpă sư ‘bôh mĭnh pôm blôh trôm gơh mơ̆t tơ lăm pơgar ei, mă lei bơlôh trôm ei iĕ dêh akâu sư mơ̆t mă lei ưh kơ đei lŭn ôh. Tuch luch sư tơchĕng khan : “dang ei inh athei ơ̆t kơ sa na gô akâu inh jing iĕ kơnh inh gơh mơ̆t lŭn bơlôh trôm âu, gô inh gơh mơ̆t sa mơ̆ng ai” . Tơpă sư adrin pơm kiơ̆ thoi sư tơchĕng ưh kơ đei sŏng sa na đunh byơ̆ đơ̆ng rŏng kơ ‘noh sư jing iĕ tơpă na akâu sư mơ̆t lŭn bôlôh trôm ĕi. Sư mơ̆t lăm pơgar plĕi hơmu ei păng oei hloi tơ ei, sư chă sa jơ̆p tơ nơm ‘long, tơpă sư sa jơnap mah mai rơkah rơkai. Đunh byơ̆ đơ̆ng rŏng tơ ‘ngla pơgar ei truh năm lăng pơgar hơmu sư, ‘bôh mơja oei tơ lăm ei na sư druh rôp yua mơja ‘noh sa đĭ plei hơmu sư. M...
Đọc thêm
Hình ảnh
T ƠDRONG M ƠSÊH PRAN KƠTANG ĐƠ̆NG PLĔNH   SHA Nơ̆r 'BKD: Tơdrong jang 1:1-11 “Mă-lei lăp Yang Bơhngol 'Lơ̆ng jur oei păng iĕm, iĕm gô đei jơhngơ̆m pran năm bơtho tơdrong Inh tơ Pơlei Jêrusalem, jơ̆p kơ dêh char Juđê păng dêh Samari, đơ̆ng noh jơ̆p kơ teh đak.”   ( Tơdrong jang 1:8) Bơ̆n hlôi ‘blŏk kơ Kră Yang jur jing bơngai hăm kơ̆l ‘bai: “Tơdrong ‘Nao ‘Lơ̆ng đơ̆ng plĕnh.” Phĕt ‘blŏk kơ Kră Yang chu pơmat: “Kră Yang lôch yua kơ inh”; Kră Yang iung arih: “Kră Yang iung arih pơyua kơ inh”. Phĕt ‘blŏk kơ Kră Yang tŏk tơ plĕnh: “Kră Yang tŏk tơ plĕnh.” Năr âu bơ̆n 'blŏk kơ Yang Bơhngol ‘Lơ̆ng jur hăm kơ̆l ‘bai: “Tơdrong Mơsêh pran kơtang đơ̆ng plĕnh” . Hlôi kơ dôm tơdrong ‘noh trŏ tơpă kơ Kră Yang Yêsu bơih ‘Bok Dŏng Pơklaih đơ̆ng plĕnh jur tơ ala teh pơm keh tơdrong huai iŏk kon bơngai đơ̆ng tơdrong yoch. Đơ̆ng rŏng kơ Kră Yang Yêsu tŏk tơ plĕnh, Yang Bơhngol ‘Lơ̆ng kư̆m đơ̆ng plĕnh jur pơjing Khul Bơngai Lui, oei hơdai hăm khul bơngai lui, ăn kơ khul bơngai lui păng ...
Đọc thêm