KRĂ YANG RƠ̆IH LU BƠ̆N.

KRĂ YANG RƠ̆IH LU BƠ̆N.

“Ưh kơ sĭ iĕm krao Inh tơbôl păng iĕm ôh sơ̆, Inh krao iĕm wă kơ iĕm bôl păng Inh păng Inh wơh iĕm, wă kơ iĕm năm chă bơtho đe wă kơ đei plei păng wă kơ plei noh huay kơ ôm. Dah iĕm apinh 'Bă Inh tơdrong kiơ yua kơ iĕm tơbôl păng Inh, tơdrong noh Sư gô ăn kơ iĕm tơpă.”

(Yô-Han 15:16)

- Kơkuh kơ đĭ đăng lu bơ̆n, Inh anăn HYUCH, bơngai adrĕch Bahnar, đĭch đam ‘Bok Kei-Dei. Bơnê kơ Kră Yang song phep bơ̆n hŏk pơhrăm nơ̆r ‘Bok Kei-Dei hơdai hăm inh lăm pơgê ‘nâu. Inh apĭnh jet lu bơ̆n thoi âu : yua kơ kiơ bơ̆n hŭt lê̆ tơdrong so nhen thoi et hơ̆t, et sơdrô, tơ-tông klĕ… na wih lui kơ ‘Bok Kei-Dei ? Kơnhăm lu bơ̆n lui kơ ‘Bok Kei-Dei wă pơm kiơ ? chăk lu bơ̆n đei drơ̆ng lăm to khan: “lui kơ ‘Bok Kei-Dei wă kơ đei tơdrong arih ling lang” dah kiơ ? trŏ bơih, noh bơ̆n bơnê kơ ‘Bok Kei-Dei, lei lăm pơgê ‘nâu bơ̆n hŏk pơhrăm hơdai nơ̆r ‘Bok Kei-Dei hăm kơ̆l ‘bai : “Kră Yang Rơ̆ih Lu Bơ̆n”, trong tơm lăm Yô-han 15:16. Tơdah bơ̆n đŏk nơ̆r yuan chih tôch kơ hơđăl: "Ấy chẳng phải các ngươi đã chọn ta, bèn là ta đã chọn và lập các ngươi, để các ngươi đi và kết quả, hầu cho trái các ngươi thường đậu luôn: Lại cũng cho mọi điều các ngươi sẽ nhân danh ta cầu xin Cha, thì Ngài ban cho các ngươi". Lei na bơ̆n hơlen năng yua kơ kiơ Kră Yang rơih iŏk lu bơ̆n lui kơ Sư? Sư wă kơnhăm tơdrong kiơ kơ lu bơ̆n ? Đei pêng tơdrong tơ ala âu bơ̆n manuh hơdai:

1. Kră Yang Rơ̆ih Iŏk Lu Bơ̆n.

- Trong 16^a chih : “Ưh kơ sĭ iĕm krao Inh tơbôl păng iĕm ôh sơ̆, Inh krao iĕm wă kơ iĕm bôl păng Inh”. Tơpă bơ̆n đei măt lăm teh đak âu ‘noh đơ̆ng Kră Yang song phep, Blŭng a sơ̆ Sư rơ̆ih iŏk bơ̆n bơ̆ih, đơ̆ng timă đei lu bơ̆n lăm klak mĕ bơ̆n mă lei Sư băt kơ bơ̆n bơih.(Jê-rê-mi 1:4,5 “ Kră Yang Yêhôwa khan kơ inh thoi âu: ⁵ “Inh băt kơ ih adrol kơ Inh pơjing ih lăm klak mĕ ih; adrol kơ đe tơpŭ kơ ih, Inh rơih iŏk ih, Inh wă ăn kơ ih jing bơngai khan lê̆ adrol kơ jơ̆p teh đak.”. yua kơ thoi noh na bơ̆n băt, bơ̆n gơh lui kơ Kră Yang ‘Bok Kei-Dei âu kư̆m dai đơ̆ng ‘Bok Kei-Dei rơih krao ‘mơ̆i ưh kơ sĭ đơ̆ng bơ̆n ‘maih kơdih đĕch ôh. Trŏ kơ bơ̆n bơnê kơ ‘Bok Kei-Dei tơpă yua kơ đei rơbâu bơngai oei lăm teh đak âu mă lei sư krao iŏk bơ̆n jing kon Sư. Ha-lê-lu-ya.

2. Yua Kơ Kiơ Sư Rơ̆ih Iŏk Lu Bơ̆n ?

-         Trong 16^b chih thoi âu: …”păng Inh wơh iĕm, wă kơ iĕm năm chă bơtho đe…”. Tơpă Kră Yang rơ̆ih krao bơ̆n lui kơ Sư âu ưh kơ sĭ wă kơ dih kâu bơ̆n lui na gơh klaih đơ̆ng yoch đĕch ôh, Sư rơih bơ̆n jing kon Sư wă kơ bơ̆n kư̆m pơm kơ dranh ăn kơ lu bơngai mă ưh tim mă lui hloi mơ̆n, jê̆ bơ̆n hloh ‘noh jơ̆ tơ duă adrĕch kon kông bơ̆n( Bahnar, jrai…) oei lơ dêh bơngai ưh timă kơtơ̆ng tơdrong ‘nao ‘Lơ̆ng ‘Bok Kei-Dei.  Yua kiơ kăl kơ roi kơ dranh kơ lu sư ? bơ̆n ‘blŏk thoi âu:  Kră Yang ‘mêm kơ đĭ đăng kon bơngai, ưh kơ sĭ pôm lu lui đĕch ôh (Yô-han 3:16), lei na sư kư̆m wă kơ lu bơ̆n ră roi , pơm kơ dranh(làm chứng) kơ lu ưh tim mă lui wă kơ lu sư dai wih brŏk lui kơ ‘Bok Kei-Dei. Pơma wă kơ ‘bônh kơ hlôh(nói cách khác) sư rơ̆ih bơ̆n wă kơ bơ̆n dŏng adĕch bơ̆n kơdih(làm chứng cho dân tộc mình). Nơ̆r ‘Bok Kei-Dei chih lăm Lĕch đơ̆ng Êgip-tơ 3-4 pơma gah ‘Bok Kei-Dei krao ‘bok Môs dŏng kon pơlĕi Ysrael. Blŭng a ‘bok Môs kư̆m mơjah kuă kơ năm & athei ‘Bok Kei-Dei rơ̆ih chă đe nai, mă lei tuch luch sư kư̆m chu năm yua kơ ‘Bok Kei-Dei rơ̆ih krao sư.

·        Lu bơ̆n hăm đei byơh jet kơdih kâu Yua kiơ Kră Yang uh kơ dan bơ̆n adrĕch yuan, na tă tơ adrĕch Bahnar ? adrĕch yuan lơ bơngai , tơdrong arih pơdrŏng, đơ̆ng noh tơdrong hlôh hơgĕi lu sư kư̆m dêh lei na lu sư băt ră tơdrong lui mă lei hăt kơ chă mơdrŏng hăt chă arih hiôk lăm teh đak âu na lu sư kuă kơ lui kơ ‘Bok Kei-Dei, đei mơ̆n bơngai lui kơ ‘Bok Kei-Dei mă lei byĕ kơ adrĕch kon kông bơ̆n.  Thoi ei na bơ̆n băt Kră Yang ‘Bok Kei-Dei dan bơ̆n jing adrĕch Bahnar âu jơ̆ minh tơdrong pŭn kơ lu bơ̆n. 

-         Kơnhăm mă ‘bar Kră Yang ‘Bok Kei-Dei rơ̆ih lu bơ̆n  lăm trong 16^c âu mơ̆n Sư chih thoi âu: “… wă kơ đei plei păng wă kơ plei noh huay kơ ôm.” Kră Yang ‘Bok Kei-Dei Sư wă kơ bơ̆n ră roi kơ bơngai ưh timă lui , ưh kơ sĭ wă kơ sư lui đĕch ôh mă lei wă kơ sư ‘noh “đei plĕi” pang wă kơ “plĕi ‘noh huăy kơ ôm”. Đei plĕi wă khan lăm chăl arih bơngai ‘noh đơ̆ng rŏng kơ sư mơ̆ng bơ̆n ră roi pơm kơdranh, sư wih lui kơ ‘Bok Kei-Dei pang chăl arih sư tơplĭh ming ‘nao,hŭt lê̆ dôm tơdrong so nhen kơ: et hơ̆t, et sơ-drô, soi sơmăh…. noh wă khan đei plĕi. Wă kơ plĕi ‘noh “huăy kơ ôm” wă khan đơ̆ng rŏng kơ sư lui kơ ‘Bok Kei-Dei , mă khan đei gleh pơmat đe pơm kơnê̆ dah hil arĕh…mă lei sư ‘noh oei lui kơjăp gơnang kơ ‘Bok Kei-Dei đĕch. Yua kơ bơ̆n băt tơpă bơ̆n ‘nao lui blŭng a sơ̆ kư̆m đei lơ tơdrong pơlong wă kơ bơ̆n achăng lê̆ tơdrong lui, mă-lĕi bơ̆n bơnê kơ ‘Bok Kei-Dei Sư ưh kơ achăng pră bơ̆n, sư wei lăng tơgŭm bơ̆n na bơ̆n kĕjĕi đei tơdrong lui thoi hrĕi ‘nâu. Kư̆m thoi ĕi , Kră Yang ‘Bok Kei-Dei wă kơ bơ̆n bơwĕi pang tơgŭm bơngai mă ‘nao wih lui ‘noh, ưh kơsĭ pơm kơ dranh đang bơ̆ih sư lui bơih mă lei bơ̆n achăng lê̆ sư ưh kơ đei bơwei bơtho tơgŭm sư, tơdah thoi noh lei sư noh ưh kơ đei plĕi ôh, păng plĕi sư ‘noh gô ôm. Tuch luch sư gô achăng lê̆ tơdrong lui yua ưh kơ hlôh. Gah tơdrong bơwĕi bơngai ‘nao lui bơ̆n hŏk iŏk đơ̆ng ‘bok Pôl, sư pơtho tơ pơlĕi iơ đei bơngai lui đơ̆ng rŏng sư wih năm tơ pơlĕi ‘noh pơtho tơ̆k sư ‘noh wơ̆ hlôh ‘mơ̆i na sư yak pơtho tơ pơlĕi nai.

3.     Đei Yua Đơ̆ng Sư Rơ̆ih Iŏk Bơ̆n ?

-    Lăm trong 16^c chih thoi âu :”…Dah iĕm apinh 'Bă Inh tơdrong kiơ yua kơ iĕm tơbôl păng Inh, tơdrong noh Sư gô ăn kơ iĕm tơpă.”. Tơdah bơ̆n chu nơ̆r Sư wơh bơ̆n lei Sư pơkă khan dôm nơ̆r bơ̆n krao khan apĭnh Sư tơdrong kiơ kiơ Sư gô tơl tơwih ăn. Mă lei ‘blŏk thoi âu: tơdrong bơ̆n krao apĭnh ‘noh athei apĭnh trŏ thoi Kră Yang lăp đon(xin theo ý Chúa), phŏ bơ̆n krao khan gĭt dêh kơ tơdrong kiơ ‘nei mă lei phŏ Kră Yang sư ưh kơ tơl tơwih ôh yua kơ Sư băt tơdrong ‘noh timă trŏ jơ, păng Sư băt tơdrong kiơ wă ăn kơ bơ̆n hơdrol hloh. Mă ‘bar athei krao apĭnh(cầu xin) hăm đon lui. Lăm Markôs 11:24 chih thoi âu : “…Inh khan kơ iĕm, mă tơdrong kiơ kiơ iĕm krao khan apinh 'Bok Kei-Dei dah iĕm lui tơpă kơ Sư gô ăn tơdrong iĕm apinh 'noh, lei iĕm gô đei tơpă.”. athei krao khan hăm đon lui păng ‘nĕ kơ ngĭl ngŭl na Kră Yang ‘Bok Kei-Dei gô tơl tơwih tơdrong bơ̆n apĭnh. Đei lơ tơdrong lơi yua kơ bơ̆n tơpă đơ̆ng jơ’năr Kră Yang rơ̆ih krao bơ̆n jing kon Sư( 1.Bơ̆n gơh klaih đơ̆ng tơdrong ‘Bok Kei-Dei wă phak(Rôm 8:1) “…dôm lu bơ̆n bơngai mă lui kơ Yêsu Krist, 'Bok Kei-Dei ưh pă wă phak lu bơ̆n dơ̆ng boih.” ; 2. Jing kon ‘Bok Kei-Dei(Yô-han 1:12) “Na dôm lu bơngai mă sơng iŏk Sư tơpă păng dôm lu bơngai lui kơ Sư, Sư ăn kơ lu bơngai 'noh jing kon 'Bok Kei-Dei.” ; 3. Đei tơdrong arih ling lang(Yô-han 3:15) “…bơngai bu lui kơ Sư, bơngai 'noh sư gô iung arih oei hơdai hăm 'Bok Kei-Dei ling lang”.)…mă lei lăm Yô-han 15:16 chih roi dôm ‘noh lei na bơ̆n ưh kơ wă chih roi pơđĭ ôh.

-         Pŭn dêh kơ lu bơ̆n âu adrĕch kon kông kơtul kơhlôh mă lei tơdrong ‘mêm ‘Bok Kei-Dei truh tơ lu bơ̆n. yua kiơ pŭn ? ‘Bok Kei-Dei krao bơ̆n jing kon Sư ‘noh mă tơdrong pŭn gĭt găl dêh, đơ̆ng anih măng mu wă huŏng lăm dơnâu ŭnh ngơngĕi bơih mă lei Sư rơih iŏk bơ̆n, jô̆ bơ̆n jing ‘lơ̆ng ‘bơ̆t anăp Sư, krao bơ̆n jing kon Sư păng pơkă wă ăn tơdrong arih ling lang kơ lu bơ̆n, tơpă tơdrong noh pŭn hloh kơ đĭ đăng. Dang ĕi tơdah bơ̆n lăng “thời sự” đŏk hơlen nơ̆r ‘Bok Kei-Dei păng hnhoi lu bơngai Ysrael, tơpă bơ̆n băt kơ jơ Kră Yang wă jur wă jê̆ truh ngĕi bơ̆ih, mălei ‘ngoaih kơ adrĕch Bahnar bơ̆n , oei đei lơ adrĕch adrung lăm kuăl teh đak âu ưh tim băt lui kơ Kră Yang ‘Bok Kei-Dei, mơnat dêh kơ lu sư tơdah ‘Bok Kei-Dei jur jơ ‘nâu lu sư ưh tim mă lui. Kơlih thoi noh na Kră Yang  pơchĕp ăn tơdrong jang Sư kơ rim ‘nu bơ̆n, wă kơ bơ̆n kư̆m roi kơ lu bơngai ưh timă lui wă kơ lu sư wih lui kơ ‘Bok Kei-Dei. Bơnê kơ ‘Bok Kei-Dei lăm pơgê ‘nâu apĭnh Yang Pơhngol ‘Lơ̆ng râu tơ’blŏk rim ‘nu lu bơ̆n băt kơdih yua kiơ ‘Bok Kei-Dei rơih iŏk lu bơ̆n ? Sư rơih iŏk lu bơ̆n wă kơ lu bơ̆n pơm thoi yơ hăm lu bơngai timă lui ?  A MEN