MƠJA HĂM PƠGAR PLĔI HƠMU

‘NĔ PĂ YƠ YƠ̆ KƠ PLAH OEI LĂM CHĂL ARIH ÂU

Đei minh pôm mơja tơmang ‘bôh lăm pơgar đe đei pơtăm plĕi hơmu đum ‘brông ‘brang; sư tơchĕng đon wă ‘maih mơ̆t sa lu plĕi hơmu ei mă lei ưh kơ đei trong wă gơh mơ̆t, yua kơ đe adrong kơjăp khơ̆ng. Rim năr sư dăr pơgar plei hơmu ei wă chă hơmŏ đei  bơlôh trôm gơh mơ̆t tơlăm, tơpă sư ‘bôh mĭnh pôm blôh trôm gơh mơ̆t tơ lăm pơgar ei, mă lei bơlôh trôm ei iĕ dêh akâu sư mơ̆t mă lei ưh kơ đei lŭn ôh. Tuch luch sư tơchĕng khan: “dang ei inh athei ơ̆t kơ sa na gô akâu inh jing iĕ kơnh inh gơh mơ̆t lŭn bơlôh trôm âu, gô inh gơh mơ̆t sa mơ̆ng ai”. Tơpă sư adrin pơm kiơ̆ thoi sư tơchĕng ưh kơ đei sŏng sa na đunh byơ̆ đơ̆ng rŏng kơ ‘noh sư jing iĕ tơpă na akâu sư mơ̆t lŭn bôlôh trôm ĕi.

Sư mơ̆t lăm pơgar plĕi hơmu ei păng oei hloi tơ ei, sư chă sa jơ̆p tơ nơm ‘long, tơpă sư sa jơnap mah mai rơkah rơkai. Đunh byơ̆ đơ̆ng rŏng tơ ‘ngla pơgar ei truh năm lăng pơgar hơmu sư, ‘bôh mơja oei tơ lăm ei na sư druh rôp yua mơja ‘noh sa đĭ plei hơmu sư. Mơja ei kơ dou klĕnh wă lĕch tơ ‘nguaih trong đêl sư mơ̆t ki ră mă lei ưh kơ lŭn bơih yua kơplah mă sư oei lăm pơgar hơmu ‘noh, sư sa mơ̆ng ai kiơ̆ sư wă na akâu sư jing tih bek hloh kơ sư hơdrol ki, wă mơ̆t tơchur lăm trôm ‘noh ră mă-lei ưh kơ hlôi na sư jing lôch răm lăm tơpang ti tơ ‘ngla mir ‘noh.

Blŭng a sư mơ̆t lăm pơgar ưh kơ đei chĕp ba kiơ, sư chu iŏk klak pơngot wă kơ gơh mơ̆t lŭn trôm, tuch luch sư wă lĕch đơ̆ng pơgar ei ră mă lei ưh pă gơh bơih, yua kơ sư oei yơ yơ̆ lăm pơgar ‘noh păng rim năr sa kiơ̆ sư wă na jing tih bek wă lĕch klĕnh trôm ưh pă lŭn dơ̆ng bơih.

kư̆m lĕ lai thoi ei mơ̆n lu bơ̆n lĕch đơ̆ng klak Mĕ bơ̆n ưh kơ đei chĕp ba kiơ, tuch luch wih brŏk tơ ‘Bok Kei-Dei kư̆m ưh kơ gơh chĕp ba kiơ mơ̆n! Lei na kơplah bơ̆n oei arih tơ kơpal teh âu ‘nĕ mă nŏng chă mŭk drăm, nŏng chă tơmam yua gah sĕch akar dêh hnang hli kơ bơ̆n yơ yơ̆! Bơ̆n jing pơhơi păng rơdu lăm đon lui , mưh năr Kră Yang jur kơnh hơmơt kơ bơ̆n lĕch ưh kơ hlôi đơ̆ng teh đak âu yua kơ tơmam tơyơ jơhngơ̆m bơ̆n tơchĕng tơ ei lơ hloh.

Nơ̆r 'Bok Kei-Dei chih thoi âu:

 “Dah iĕm đei mŭk tơmam tơ plĕnh ti, jơhngơ̆m đon iĕm kư̆m tơchĕng tơ noh mơ̆n. Dah iĕm đei mŭk tơmam tơ teh âu, jơhngơ̆m đon iĕm kư̆m tơchĕng tơ teh âu mơ̆n.” (Mathiơ 6:21)

Bơ̆n pơhrăm iŏk tơdrong kiơ đơ̆ng mơja ? pơm thoi yơ wă kơ huăy kơ răm thoi mơja ‘noh ?

Bơngai đĭch đam ‘Bok Kei-Dei Hơ ‘mon: HYUCH

manuh hăm inh lăm facebook : https://www.facebook.com/y.hyuch1994