MƠJA HĂM PƠGAR PLĔI HƠMU

TƠDRONG MƠSÊH PRAN KƠTANG ĐƠ̆NG PLĔNH

 SHA Nơ̆r 'BKD: Tơdrong jang 1:1-11

“Mă-lei lăp Yang Bơhngol 'Lơ̆ng jur oei păng iĕm, iĕm gô đei jơhngơ̆m pran năm bơtho tơdrong Inh tơ Pơlei Jêrusalem, jơ̆p kơ dêh char Juđê păng dêh Samari, đơ̆ng noh jơ̆p kơ teh đak.” 

(Tơdrong jang 1:8)

Bơ̆n hlôi ‘blŏk kơ Kră Yang jur jing bơngai hăm kơ̆l ‘bai: “Tơdrong ‘Nao ‘Lơ̆ng đơ̆ng plĕnh.” Phĕt ‘blŏk kơ Kră Yang chu pơmat: “Kră Yang lôch yua kơ inh”; Kră Yang iung arih: “Kră Yang iung arih pơyua kơ inh”. Phĕt ‘blŏk kơ Kră Yang tŏk tơ plĕnh: “Kră Yang tŏk tơ plĕnh.” Năr âu bơ̆n 'blŏk kơ Yang Bơhngol ‘Lơ̆ng jur hăm kơ̆l ‘bai: “Tơdrong Mơsêh pran kơtang đơ̆ng plĕnh”.

Hlôi kơ dôm tơdrong ‘noh trŏ tơpă kơ Kră Yang Yêsu bơih ‘Bok Dŏng Pơklaih đơ̆ng plĕnh jur tơ ala teh pơm keh tơdrong huai iŏk kon bơngai đơ̆ng tơdrong yoch. Đơ̆ng rŏng kơ Kră Yang Yêsu tŏk tơ plĕnh, Yang Bơhngol ‘Lơ̆ng kư̆m đơ̆ng plĕnh jur pơjing Khul Bơngai Lui, oei hơdai hăm khul bơngai lui, ăn kơ khul bơngai lui păng lu đĭch đam Kră Yang, lu kon 'Bok Kei-Dei tơdrong mơsêh đei jơhngơ̆m pran wă kơ năm bơtho Tơdrong ‘Nao ‘Lơ̆ng Yêsu Krist jơ̆p kơ teh đak, thoi lăm Tơdrong jang 1:8 chih: “Mă-lei lăp Yang Bơhngol 'Lơ̆ng jur oei păng iĕm, iĕm gô đei jơhngơ̆m pran năm bơtho tơdrong Inh tơ Pơlei Jêrusalem, jơ̆p kơ dêh char Juđê păng dêh Samari, đơ̆ng noh jơ̆p kơ teh đak.”

I.       TƠBLANG TƠDRONG MƠSÊH PRAN KƠTANG ĐƠ̆NG PLĔNH. 

Mưh bơ̆n pơma gah tơdrong mơsêh pran kơtang đơ̆ng plĕnh, lơ bơngai hlôh glăi tơchĕng khan tơdrong mơsêh pran kơtang đơ̆ng plĕnh thoi tơdrong mơsêh đơ̆ng lu pơjâu, tơ’bôh lăm tơdrong lu sư chă pơm ngôi chă hơlĕnh đĕch dah mă nhen thoi tơdrong gơh hơgei đe chă pơm ngôi pơdah lăm phim… Tơpă ưh kơ thoi noh ôh. Tơdrong mơsêh pran kơtang đơ̆ng plĕnh lăm Tơdrong jang 1:8 tơ’bôh tơbăt gah:

1.        Tơdrong mơsêh pran kơtang Yang Bơhngol ‘Lơ̆ng lăm Pah so.

Yang Bơhngol ‘Lơ̆ng 'Bok Kei-Dei dah Yang Bơhngol ‘Lơ̆ng Yêhôwa ‘noh jơ̆ Yang Bơhngol ‘Lơ̆ng lăm Pah ‘nao. Sơ̆p hla bơar 'Bok Kei-Dei Pah so chih roi lơ tơdrong mơsêh Yang Bơhngol ‘Lơ̆ng 'Bok Kei-Dei pơm. Yang Bơhngol ‘Lơ̆ng 'Bok Kei-Dei jơ̆ Yang mă pêng lăm pêng anăn 'Bok Kei-Dei, Sư đei hơdai hăm Yang ‘Bă păng Yang Kon. Yang Bơhngol ‘Lơ̆ng 'Bok Kei-Dei đei tôm tơdrong lei-lăi thoi 'Bok Kei-Dei. Iŏk đơ̆ng blŭng a sơ̆ tơdrong mơsêh Yang Bơhngol ‘Lơ̆ng 'Bok Kei-Dei đei tơ’bôh hơđăl:

“Teh ưh kơ đei hơbŏ păng ưh kơ đei kiơ lăm noh, tơ jơ̆p-jang oei măng mu ngăl, Yang Bơhngol 'Lơ̆ng Kră Yang 'Bok Kei-Dei asơ̆ng kơpal đak” (Blŭng a 1:2). Yang Bơhngol ‘Lơ̆ng 'Bok Kei-Dei jơ̆ Yang Bơhngol ‘Lơ̆ng đei dan hơmet đĭ đăng tôm tơdrong tơ proh ‘lơ̆ng lăm plĕnh teh.

“Hăm kial dui jơhngơ̆m Sư hơmet ming lu plĕnh” (Jop 26:13). Yang Bơhngol ‘Lơ̆ng 'Bok Kei-Dei bơwei plĕnh teh păng đĭ đăng tơmam.

Yang Bơhngol ‘Lơ̆ng Yêhôwa oei hơdai, ăn tơdrong gơh hơgei, hlôh wao; ăn jơhngơ̆m pran păng tơdrong hlôh băt kơ Kră Yang Yêsu kơplah Sư bơ̆jang lăm teh đak âu sơ̆, wă Dŏng pơklaih kon bơngai bơ̆n, huai iŏk bơ̆n đơ̆ng tơdrong yoch: “Yang Bơhngol Kră Yang gô oei kơpal Sư, Yang Bơhngol ăn kơ sư đei đon gơh hơgei păng mơsêh mơyang, Yang Bơhngol ăn kơ sư hlôh băt păng hli yom kơ Kră Yang.” (Êsai 11:2). Mă ‘bar wă khan tơdrong mơsêh pran kơtang đơ̆ng plĕnh jơ̆:    

2.        Tơdrong mơsêh pran kơtang Yang Bơhngol ‘Lơ̆ng lăm Pah ‘nao.

“Truh Năr Giĕng Pangtơkôt, lu bơngai lui kơ Yêsu akŭm minh anih. Lu sư kơtơ̆ng grơu đei re jơwa đơ̆ng plĕnh thoi lĕ kial hơbŭt tih 'bĕnh kơ hnam hloi. Lu sư 'bôh pla ŭnh jruh rim 'bơ̆t lu sư. Yang Bơhngol 'Lơ̆ng mơ̆t 'bĕnh kơ rim 'nu lu sư. Na lu sư pơtơm pơma pha ra hloi nơ̆r kiơ̆ thoi Yang Bơhngol 'Lơ̆ng ăn kơ lu sư pơma.” (Tơdrong jang 2:1-4)

Lăp năr phĕt Pang tơkôt lu bơngai Juđê, Yang Bơhngol ‘Lơ̆ng jur oei păng lu bơngai lui, kiơ̆ thoi nơ̆r Kră Yang Yêsu đei pơkă: “Hơtai ei lu sư oei akŭm dih băl, Yêsu khă lu sư: “Iĕm 'nĕ tam jăk đơ̆ng Pơlei Jêrusalem, iĕm athei chang gô Yang Bơhngol 'Lơ̆ng mă đêl 'Bă Inh pơkă gô ăn kơ iĕm kư̆m thoi Inh roi kơ iĕm ki.” (Tơdrong jang 1:4). Kră Yang Yêsu oei pơkă kơ lu bơngai pơhrăm păng Sư: “Mă-lei lăp Yang Bơhngol 'Lơ̆ng jur oei păng iĕm, iĕm gô đei jơhngơ̆m pran năm bơtho tơdrong Inh tơ Pơlei Jêrusalem, jơ̆p kơ dêh char Juđê păng dêh Samari, đơ̆ng noh jơ̆p kơ teh đak.” (Tơdrong jang 1:8).

Yang Bơhngol ‘Lơ̆ng jur oei hơdai hloi khul bơngai lui păng lu đĭch đam Kră Yang Sư bơih Yang Dŏng mơnat, Yang tơdrong tơpăt, ‘Bok pơsĭt lăm bơ̆n bơngai lui mơn kơdih jing kon Kră Yang 'Bok Kei-Dei, tơbăt kơ bơ̆n bơngai klaih truh năr bơ̆n gơh oei hăm 'Bok Kei-Dei ning mônh: “Na sơ̆ lăp iĕm kơtơ̆ng đe bơtho Tơdrong ‘Nao ‘Lơ̆ng Sư wă kơ iĕm klaih đơ̆ng tơdrong yoch, na iĕm lui hloi kơ tơdrong 'Bok Kei-Dei bơtho noh. ‘Bơ̆t ‘noh iĕm đei Yang Bơhngol ‘Lơ̆ng jur oei păng iĕm.” Yang Bơhngol ‘Lơ̆ng bơih ăn tơdrong mơsêh kơ lu kon 'Bok Kei-Dei wă kơ arih ‘lơ̆ng păng pơm ‘blep trŏ thoi Sư wă. Thoi noh ‘bok Pôl bơtho kơ lu bơngai lui tơ pơlei Êphêsô: “Iĕm ‘nĕ kơ pơm kơ Yang Bơhngol ‘Lơ̆ng sơ’ngon kơ iĕm, yua kơ Sư oei lăm iĕm, dang Sư chơ̆m đŏng yâu tơklĕng iĕm, tơbăt kơ bơ̆n bơngai klaih gơh oei hăm Sư ning mônh.” (Êphêsô 1:13. 4:30; Rôm 8:16).

II.     ‘BÔH HƠĐĂL NHEN TƠDRONG MƠSÊH PRAN ĐƠ̆NG PLĔNH.

Tơdrong mơsêh kĕ pran Yang Bơhngol ‘Lơ̆ng ‘bôh nhen hơđăl kơplah Sư jur tơ’bôh kơ 120 ‘nu bơngai pơhrăm tơ lăm hnam gah anih tơ kơpal. (Tơdrong jang 2:1-13) hăm dôm tơdrong đei truh thoi tơ ala âu:

1.        Yang Bơhngol ‘Lơ̆ng ‘bĕnh blai rim ‘nu.

Tơdrong jang 2:4 chih: “Yang Bơhngol 'Lơ̆ng mơ̆t 'bĕnh kơ rim 'nu lu sư. Na lu sư pơtơm pơma pha ra hloi nơ̆r kiơ̆ thoi Yang Bơhngol 'Lơ̆ng ăn kơ lu sư pơma.” Tơdrong Yang Bơhngol ‘Lơ̆ng ‘bĕnh blai păng oei hơdai ling lang hăm lu bơngai pơhrăm păng Sư ‘noh jơ̆ tơdrong mơnat ăn đĕch hlĭch dêh tam đei thoi noh ôh đơ̆ng sơ̆. Nơ̆r “Bĕnh blai” dah tuh ‘bĕnh blai nơ̆r noh wă chih roi tơdrong đei ‘bôh nhen Yang Bơhngol ‘Lơ̆ng pơgơ̆r păng bơ̆jang lăm lu bơngai pơhrăm păng Sư pơm kơ lu sư: “Lu sư pơtơm pơma phara.” ‘Nâu jơ̆ tơdrong mơsêh hlĭch yua kơ lu bơngai pơhrăm ‘noh tam biơh pơma, tam mă hŏk pơma lu nơ̆r ‘noh, mă-lei tơdrong mơsêh mơyang Yang Bơhngol ‘Lơ̆ng pơih ‘bơ̆r lu sư “Lu sư pơma dôm lu tơdrong mơsêh mơyang 'Bok Kei-Dei pơm.” Lu bơngai pơhrăm păng Sư ưh kơ đei pơma nơ̆r hlĭch lu nơ̆r re thoi lu hơ’lơ̆p bơlăm, pơma hrĕnh, pơma hrơ̆ng hreng ưh kơ đei yua, mă-lei lu sư pơma lu nơ̆r adrĕch nai “kiơ̆ thoi Yang Bơhngol ‘Lơ̆ng ăn”. ‘Bok Pôl pơma rơđah nhen tơdrong âu thoi lăm I Kôrintô 12:11: “Đei minh 'nu Yang Bơhngol 'Lơ̆ng đĕch ăn kơ bơ̆n tôm tơdrong hơgei 'noh, Sư asong kơ rim 'nu bơngai bu kiơ̆ kơ Sư wă.” Tơdrong âu trŏ thoi noh tơpă, ưh kơsĭ dôm lu kon Kră Yang ‘maih wă tơdrong hơgei hơyơ na chơ chă hăm tơdrong pơhrăm pơtơ̆p dah đơ̆ng bơngai nai pel kơ̆l krao khan. Lu kon Kră Yang athei chĭt đon ‘nĕ kơ mơ̆ng lu nơ̆r tơblang chroih tơ nai đơ̆ng lu bơngai bơtho hơlĕnh, wă huay kơ puh kiơ̆ yang kơnê̆ pơhlŭ na pơm kiơ̆ kơ sư na bơtho hơlĕnh. ‘Bôh rơđah hơđăl mă ‘bar gah tơdrong mơsêh pran Yang Bơhngol ‘Lơ̆ng: 

2.        Yang Bơhngol ‘Lơ̆ng ăn tơdrong mơsêh kĕ pran kơ lu bơngai pơhrăm păng Sư wă bơtho tơdrong Kră Yang Yêsu.

Adrol kơ Yang Bơhngol ‘Lơ̆ng ‘bĕnh blai rim ‘nu bơngai pơhrăm păng Sư, anih mă lu sư juăt kơ akŭm krao khan tang chơ kăl ‘măng; mă-lei đơ̆ng rŏng kơ Yang Bơhngol ‘Lơ̆ng mơ̆t ‘bĕnh blai, lu bơngai pơhrăm păng Sư pơ̆n nuih iung bơtho kon pơlei lui kiơ̆ khul Juđê, đơ̆ng jơ̆p jang rim anih năm tơ pơlei Jêrusalem wă pơm phĕt Pang tơkôt, păng pơ̆n nuih bơtho tơdrong Kră Yang Yêsu Krist. Mơsêh kĕ pran Yang Bơhngol ‘Lơ̆ng bơ̆jang tơbăt tơdrong yoch lu sư na tơbral păng pơma: “…Kơtơ̆ng tơdrong 'noh boih, lu kon tơring mơn lăm jơhngơ̆m sư na jet Pêtrôs hăm lu bôl sư khan: “Ơ 'nhŏng oh, nhôn athei pơm lơliơ wă klaih đơ̆ng tơdrong yoch?” Pêtrôs khan: “Iĕm athei tơbral kơdih tơdrong yoch iĕm. Iĕm athei iŏk 'batem hăm anăn Yêsu Krist wă kơ Sư pơklaih tơdrong yoch iĕm, Sư ăn kơ iĕm Yang Bơhngol 'Lơ̆ng.” (Tơdrong jang 2:37, 38). Đei yua đơ̆ng nơ̆r ‘bok Pêtrôs bơtho đei 03 rơbâu ‘nu lui sơng iŏk Kră Yang Yêsu păng tơmơ̆t lăm khul bơngai lui. Tơdrong ‘nâu ưh kơ ‘bônh ôh hăm lu bơngai Juđê, lăp minh tơdrong mơsêh pran đơ̆ng Yang Bơhngol ‘Lơ̆ng lu bơngai pơhrăm păng Sư gơh pơm tơdrong âu. Tơdrong ‘bôh rơđah hơđăl mă pêng:

3.        Yang Bơhngol ‘Lơ̆ng bơwei păng tơiung khul bơngai lui wơ̆ pran kơplah oei tơ ala teh.

Ưh tam mă đei tơdrong pơjing khul ayơ oei lăm teh đak âu mă đe pơm kơnê̆ tih krưp thoi khul bơngai lui kơ Kră Yang 'Bok Kei-Dei mă oei tơ ala teh âu. Mă-lei ưh kơsĭ oei oei đĕch truh dang ei, mă ‘noh tơdrong wơ̆ pran jơ̆p kơ teh đak dơ̆ng mơ̆n. Đei thoi noh, yua đơ̆ng Yang Bơhngol ‘Lơ̆ng oei hơdai hăm khul bơngai lui păng kơdih Kră Yang Yêsu “‘Bok mă chĕp tơpơh tŏ sơnglŏng tơ ti ‘ma Sư, mă Sư nơ năm lăm tŏk bŏk jơ̆ng kơđeng maih” (Tơdrong tơ’bôh 2:1). Tơpơh tŏ sơnglŏng wă pơtih kơ lu đĭch đam Kră Yang, păng tơpơh tŏ jơ̆ng kơđeng maih ‘noh pơtih kơ khul bơngai lui kơ Sư. Tơpă, bơ̆n lăng ‘bôh nhen tơdrong lui mă oei oei truh dang ei păng khul bơngai lui kơ Kră Yang wơ̆ tŏk wơ̆ pran tơ ala teh, mă bu bu kư̆m băt nhen dôm tơdrong ‘noh yua đơ̆ng mơsêh pran Yang Bơhngol ‘Lơ̆ng.

III.    WĂ KƠ ĐEI TƠDRONG MƠSÊH PRAN ĐƠ̆NG PLĔNH

‘Nâu bơih jơ̆ tơdrong tơgŭm kơ lu jơ̆ng ‘bang đei tơdrong mơsêh pran đơ̆ng plĕnh đơ̆ng rŏng kơ mơjĭt năr chang gô:

1.        Pôm jơhngơ̆m đon krao khan păng chang gô.

Đơ̆ng rŏng kơ wih brŏk đơ̆ng Kông Ôliwơ, lu bơngai pơhrăm păng Sư akŭm tơ hnam kơ jung oei răp gô nơ̆r Kră Yang đei pơkă gah Yang Bơhngol ‘Lơ̆ng: “Hơtai ei lu sư oei akŭm dih băl, Yêsu khă lu sư: “Iĕm 'nĕ tam jăk đơ̆ng Pơlei Jêrusalem, iĕm athei chang gô Yang Bơhngol 'Lơ̆ng mă đêl 'Bă Inh pơkă gô ăn kơ iĕm kư̆m thoi Inh roi kơ iĕm ki.” (Tơdrong jang 1:4) lăm mơjĭt năr, “Lu đe âu krao khan ling lang kơ Kră Yang 'Bok Kei-Dei. Kư̆m đei Mari mĕ Yêsu păng lu oh Yêsu drŏ-nglo păng lu drŏ-kăn nai dơ̆ng akŭm pôm đon krao khan păng lu sư mơ̆n.” (Tơdrong jang 1:14). Đơ̆ng rŏng kơ mơjĭt năr lu sư krao khan ling-lang păng chang gô, Yang Bơhngol ‘Lơ̆ng jur oei hơdai hăm lu bơngai pơhrăm păng Sư trŏ thoi nơ̆r Jôel ‘bok khan lê̆ adrol pơma thoi âu: “Năr ei kơnh Inh gô tuh ăn Yang Bơhngol 'Lơ̆ng Inh… Lu kon drŏ-nglo kon drŏ-kăn gô pơma khan lê̆ adrol; dôm lu kră iĕm gô hơpo 'bôh, păng dôm lu kon hơ'lơ̆p iĕm gô 'bôh tơdrong tơ'bôh đơ̆ng Kră Yang. Lăm năr noh mă dôm lu đĭch đam drŏ-nglo drŏ-kăn Inh kư̆m gô tuh ăn Yang Bơhngol 'Lơ̆ng Inh.” (Jôel 2:28, 29).

Minh jơhngơ̆m đon krao khan noh jơ̆ tơdrong wă kơ kon pơlei pơla Kră Yang đei tơdrong mơsêh kĕ pran đơ̆ng Yang Bơhngol ‘Lơ̆ng na gơh arih păng arih bơ̆jang đei yua kơ Kră Yang. Mă đĭ đăng râu tơiung tơdrong lui mă đơ̆ng sơ̆ khơ̆ dang ei tă lĕch đơ̆ng tơdrong krao khan păng chang gô ngăl. Hơpơi kơ đĭ đăng bơngai lui jơ̆p jang kơ anih pôm jơhngơ̆m đon krao khan tang tơdrong jang Kră Yang păng khul bơngai lui đei wơ̆ pran lăm tơdrong jang dŏng pơklaih kon bơngai. ‘Nguaih kơ noh dơ̆ng wă kơ đei Yang Bơhngol ‘Lơ̆ng pơgơ̆r, kon pơlei Kră Yang athei đei jơhngơ̆m:  

2.        Rơhing păng chơ chă.

Kră Yang ưh kơ đei khă găn kon pơlei Sư rơhing păng chơ chă tơdrong gơh hơgei păng đei tơdrong mơsêh pran Yang Bơhngol ‘Lơ̆ng oei hơdai wă kơ chăl arih đei Yang Bơhngol ‘Lơ̆ng pơgơ̆r păng tơdrong jang đei yua. Nơ̆r Kră Yang bơtho kơ kon pơlei pơla: “Thoi noh lăm dôm tơdrong jang 'noh, bơ̆n athei apinh 'Bok Kei-Dei ăn kơ bơ̆n tơdrong jang mă kăl yua 'biơ̆. Mă-lei dang ei inh wă bơtho iĕm gah tơdrong mă kăl tơpă.” (I Kôrintô 12:31). Mă-lei bơ̆n kon pơlei Kră Yang “Bơ̆n ‘nĕ pơang akâu bơ̆n kơdih. Bơ̆n ‘nĕ chă tơdrong wă tơhil dih băl păng ‘nĕ kơ ‘nhĕng dih băl.” (Galati 5:26); kư̆m ‘nĕ kơ pơyua tơdrong tơchĕng kơdih păng tơdrong juăt tơ ala teh wă kơ gơh đei yua lăm hnam akŭm. Dah wă chă đon lơi yua kơdih thoi bơngai ưh kơ lui pơm yoch, hiong tơdrong pŭn hiôk, păng Kră Yang gô phak tăm! Wă kơ Yang Bơhngol ‘Lơ̆ng oei hơdai, tơdrong gĭt mă kon pơlei Kră Yang kăl kơ đei:     

3.        Chu yom păng yak kiơ̆ Yang Bơhngol ‘Lơ̆ng.

‘Nâu jơ̆ trong păng tơdrong kăl kơ pơm wă kơ gơh adrin wă kơ kon pơlei Kră Yang đei tơdrong mơsêh Yang Bơhngol ‘Lơ̆ng oei hơdai. Lăm jơ phŭt đei minh ‘nu bơngai pơm yoch băt tơbral kơdih tơdrong yoch na lui sơng iŏk Kră Yang, na bơngai ‘noh gô pơm ‘Batem păng Yang Bơhngol ‘Lơ̆ng, wă khan đei Yang Bơhngol ‘Lơ̆ng oei hơdai truh năr Kră Yang dŏng pơklaih. Păng lăm trong bơ̆n kiơ̆ Kră Yang, bơngai đei Yang Bơhngol ‘Lơ̆ng pơgơ̆r athei yak kiơ̆ Yang Bơhngol ‘Lơ̆ng, chu yom Yang Bơhngol ‘Lơ̆ng, wă kơ Sư pơgơ̆r păng wă kơ gơh arih bơ̆jang kơ Kră Yang păng jang lơ tơdrong jang tih ăn kơ Kră Yang, kơ khul bơngai lui.

Hơpơi kơ đĭ đăng bơngai lui tă kơ đei Yang Bơhngol ‘Lơ̆ng pơgơ̆r ngăl, wă kơ tơdrong arih đei tơdrong ‘lơ̆ng na ba lơ bơngai wih brŏk tơ 'Bok Kei-Dei: “Mă-lei lăp Yang Bơhngol 'Lơ̆ng jur oei păng iĕm, iĕm gô đei jơhngơ̆m pran năm bơtho tơdrong Inh tơ Pơlei Jêrusalem, jơ̆p kơ dêh char Juđê păng dêh Samari, đơ̆ng noh jơ̆p kơ teh đak.” (Tơdrong jang 1:8).

A-MEN!